Thursday, September 29, 2016

09.11.16 &10.11.16 இரண்டு நாட்கள் வேலை நிறுத்தம்!

நான்கு கட்ட போராட்டம்  -  
இரண்டு நாட்கள்  வேலை நிறுத்தம் 

தேசிய அளவிலான POSTAL JCA ( NFPE /FNPO) முடிவின்படி  GDS ஊழியர்களுக்கு உயர்த்தப்பட்ட போனஸ் வழங்கிட வேண்டியும் கேசுவல் ஊழியர்களுக்கு தரவேண்டிய உயர்த்தப்பட்ட ஊதியம் உள்ளிட்ட கோரிக்கைகளை நிறைவேற்றிட வேண்டியும்  இரண்டு நாட்கள் வேலை நிறுத்தம் உள்ளிட்ட நான்கு கட்ட போராட்டம்  இன்று அறிவிக்கப் பட்டுள்ளது .

தமிழகத்தில் NFPE  கேசுவல்  ஊழியர்களின்  தென் மண்டல மாநாட்டில்   ஏற்கனவே எடுக்கப்பட்ட முடிவின்படியும் , ஏற்கனவே   தமிழ்  மாநில NFPE அஞ்சல்  RMS இணைப்புக் குழுவில்  எடுக்கப்பட்டு  சுற்றறிக்கை மூலம் அறிவிக்கப்பட்ட  முடிவின் படியும் , முதல் இரண்டு நிலை  போராட்டங்கள்  தமிழகத்தில் 

எதிர்வரும் 29.9.2016 அன்று  கோட்ட /கிளைகளில் 
கருப்பு சின்னம் அணிந்து  கண்டன  ஆர்ப்பாட்டம்  

எதிர்வரும் 05.10.2016 அன்று  மாநிலத் தலைமையகமான
CPMG  அலுவலக வாயிலில் 
முழு நாள் தர்ணா  போராட்டம்  










என இரண்டு கட்டமாக NFPE  ன்  அனைத்து  உறுப்பு சங்கங்களாலும் நடத்தப்படும். இதர போராட்டங்கள்  POSTAL JCA  அறிவித்தபடி  நடைபெறும். எனவே  இதில் எந்த ஒரு கோட்ட  / கிளை செயலர்களுக்கும் குழப்பம்  வேண்டாம்  என்று கேட்டுக் கொள்கிறோம். போராட்டங்களை எந்த ஒரு கிளைகளிலும் விடுதல் இன்றி சிறப்பாக நடத்திட  கேட்டுக் கொள்கிறோம்.  நடத்தப்படும் ஆர்ப்பாட்டம் தொடர்பாக   செய்தி  மற்றும் காட்சி  ஊடகங்களுக்கு  தகவல் தெரிவித்திட  வேண்டுகிறோம். மேலும் இந்த நிகழ்வில் எடுக்கப்படும் புகைப்படங்களை  EMAIL  மூலம் தாமதமின்றி  மாநிலச்  சங்கத்திற்கு அனுப்பி வைத்திட வேண்டுகிறோம். இந்த செய்தியை பார்க்கின்ற தோழர்கள்  தயவு செய்து இந்த செய்தி தெரியாத  இதர தோழர்களுக்கும்  தெரிவித்திட வேண்டுகிறோம். போராட்டம் வெற்றிகரமாக நடந்திட அனைத்து ஆயத்தப்பணிகளையும் செய்திட வேண்டுகிறோம்.

இரண்டரை லட்சம் GDS ஊழியர்களின்  உரிமை காக்க  போராடுவோம் !
ஒரு லட்சம் கேசுவல் ஊழியர்களின் உரிமைக்காக  போராடுவோம் !
உழைக்கும்  வர்க்கம்  ஓரணியில்  திரளட்டும்
ஊழியர்களின் உரிமை ஓங்கி ஒலிக்கட்டும் !




Friday, September 2, 2016

செப்டம்பர் 02, 2016 வேலை நிறுத்தம் தமிழக அஞ்சல், RMS பகுதிகளில் மாபெரும் வெற்றி !

செப்டம்பர் 02, 2016 வேலை நிறுத்தம்  
தமிழக அஞ்சல், RMS பகுதிகளில் மாபெரும்  வெற்றி !

தமிழகத்தின் பெரும்பான்மையான பகுதிகளில் இருந்தும்  இரவு  12 மணி முதலே வேலை நிறுத்த வெற்றிச் செய்திகள்  வந்துகொண்டிருக்கின்றன. வேலை நிறுத்தம் அஞ்சல் , RMS, MMS, GDS, கணக்குப் பிரிவு உள்ளிட்ட பகுதிகளில் பல கோட்டங்களில் முழுவதுமாக வெற்றி பெற்றிருக்கிறது. பல தலைமை அஞ்சலகங்கள் மூடப்பட்டுள்ளன. நூற்றுக் கணக்கான  துணை அஞ்சலகங்களும் மூடப்பட்டுள்ளன. 

மேலும் , இதர பகுதிகளான  வருமானவரித்துறை,  வங்கிகள், காப்பீட்டுத் துறை , தொலைத் தொடர்புத் துறை , மாநில அரசு ஊழியர் சங்கங்கள் , ஆசிரியர் சங்கங்கள், போக்குவரத்து ஊழியர் , திருப்பூர் , கோவை பின்னலாடைத் தொழிலாளர், ஆட்டோ-டாக்ஸி  ஓட்டுநர் , நிலக்கரித் துறை , கெயில் , ஓ.என்.ஜி .சி , NTPC , OIL , HAL , ATOMIC  ENERGY , BHEL, STEEL PLANT என்று நாட்டின் அத்துணை பகுதி  உழைக்கும் வர்க்கமும் மத்திய அரசின் தொழிலாளர் விரோதக் கொள்கைகளுக்கு எதிராக  அணி  திரண்டுள்ளது   ஒரு பேரெழுச்சியாகும். 18  கோடி தொழிலாளர்களுக்கு மேல் கலந்து கொண்ட  மிகப்பெரும்   வேலை நிறுத்தம் என்று பத்திரிகைகள் கூறுகின்றன.

இந்த செய்தி,  மத்திய அரசின் தொழிலாளர் விரோத  கொள்கைகளுக்கு எதிரான உழைக்கும் வர்க்கத்தின்  மனநிலையை  தெளிவாக அரசுக்கு எடுத்துக் கூறுகிறது. ஏழாவது ஊதியக் குழு பரிந்துரை அமல் படுத்துதலில் அரசு தனது ஊழியர்களை  ஏமாற்றியதன்  வெளிப்பாடு  இந்த வேலை நிறுத்தம்.

அரசுத் துறைகளில் தனியார்மயம்,  ஆட்குறைப்பு, ஆளெடுப்புத் தடை , தொழிலாளர் விரோத சட்டங்கள்,  PERFORMANCE  என்ற பெயரில் தொழிலாளர்களை அடிமைப்படுத்த நினைக்கும்  எதேச்சாதிகாரப் போக்கு  - இவற்றிற்கு எதிரானதே  இந்த  வேலை நிறுத்தம்.

இந்த வேலை நிறுத்தத்தின் விளைவாக திறக்காத  கதவுகள்  எல்லாம் திறக்கப்பட்டன . போனஸ்  உச்ச வரம்பு ரூ. 7000/- ஆக உயர்த்துதல் , அரசு ஊழியர்களுக்கு பொருந்தாது என்று கடந்த ஆண்டு கடிதம் அளித்த  அதே நிதி அமைச்சர் அருண் ஜெட்லி , இப்போது  சட்ட விளக்கமே பெறாமலே மத்திய அரசு ஊழியர்களுக்கு 2014- 15 நிதி ஆண்டு முதலே உயர்த்தப்பட்ட போனஸ் வழங்கிட   உத்திரவு  அளித்துவிட்டேன்  என்று கூறுகிறார். 

புதிய ஓய்வூதியத் திட்டத்தை   திரும்பப் பெறமுடியாது  என்ற  அதே நிதி அமைச்சர்  அருண் ஜெட்லி,  இன்று NPS இல்  அனைவருக்கும் DCRG தந்துவிட்டேன் என்கிறார்.   அமைப்பு சாரா தொழிலாளர்களுக்கு குறைந்த பட்ச ஊதியம் ரூ. 350/- ஆக உயர்த்தி வழங்குகிறேன்  என்கிறார். வேலை நிறுத்தத்தை விலக்கிக் கொள்ளுங்கள் என்று  வேண்டுகிறார்.  

ஆக, ஒட்டு மொத்த தொழிலாளர்களின் இந்த  வேலை நிறுத்தம் முதலா ளித்துவ கொள்கைகளைக் கொண்ட ஆளும்  வர்க்கத்தினரிடையே  ஓர் அதிர்வலையை ஏற்படுத்தி இருப்பது நிச்சயம் புரிகிறது. அரசியல் மாச்சரியங்களைத் தாண்டி உழைக்கும் வர்க்கம் ஒன்றுபட்டால், திறக்காத இரும்புக் கோட்டைக்  கதவுகள் எல்லாம்  திறக்கும் என்பது புரிகிறது. இந்த  வெற்றி  மேலும்  பெருகட்டும்.  அரசின் நிலை மாறாவிட்டால், அடுத்த முறை  இது  ஒரு பேரெழுச்சியாக  மாறி  நாடே அதிரும் தொடர்  போராட்டமாக மாறும்  என்பது நிச்சயம் . அந்த நாள் தொலைவில் இல்லை .

இந்த வேலை நிறுத்தத்திற்கான  தயாரிப்பு வேலைகளை முழு ஈடுபாட்டுடன் தீவிரமாக செய்த அஞ்சல் RMS பகுதிகளின்  மாநிலச்  சங்க நிர்வாகிகள், கோட்ட / கிளை செயலர்கள் , மகிளா  கமிட்டி நிர்வாகிகள் மற்றும்  அனைத்து தோழர் /தோழியர்களுக்கு  அஞ்சல் மூன்று மாநிலச் சங்கத்தின் நெஞ்சார்ந்த  நன்றியைத் தெரிவித்துக் கொள்கிறோம்.

Wednesday, August 31, 2016

தானாக வருவதல்ல வெற்றிகள் ! நம் போராட்டத்தின் பலனே வெற்றிகள் !

அன்புத் தோழர்களே !  தோழியர்களே !! வணக்கம் !

தானாக  வருவதல்ல வெற்றிகள் !
நம் போராட்டத்தின் பலனே  வெற்றிகள் !

ஏற்கனவே 2016, ஜூன் 30ந் தேதி அமைச்சரவை குழுவுடன் நடைபெற்ற பேச்சு வார்த்தையில் NJCA  தலைவர்களுக்கு  புதிய ஓய்வூதியத் திட்டத்தில் முன்னேற்றங்கள் செய்திட உயர்மட்டக்  குழு அமைக்கப்படும் என்ற உறுதிமொழி அளிக்கப்பட்டது உங்களுக்குத் தெரியும்  . ஆனால் உயர்மட்டக் குழு அமைப்பதற்கு முன்னதாகவே   1.1.2004 முதல் பணியாற்றும் ஊழியர்களுக்கு  புதிய ஓய்வூதியத் திட்டத்தில்  DCRG அளிக்கப்படும் என்ற உத்திரவு  மத்திய அரசினால் கடந்த 26.8.2016 அன்று வெளியிடப்பட்டது. இது ஒரு மிகப்பெரும் வெற்றியாகும்.

மத்திய அரசு ஊழியர்களுக்கு போனஸ் உச்ச வரம்பு நீக்கப்படவேண்டும் என்று நாம் பலகாலம் போராடி வருகிறோம். செப். 2 , 2016 வேலை நிறுத்த கோரிக்கைகளில் இதுவும் ஒன்று. கடந்த ஆண்டு இதே ஒரு நாள் வேலை நிறுத்த அறிவிப்பின் விளைவாக  11 மையத்  தொழிற் சங்கங்களுடன் நடைபெற்ற பேச்சு வார்த்தையின் பின்னர் ,போனஸ் உச்சவரம்பை  ரூ. 3500/- உள்ளிருந்து  ரூ. 7000/- ஆக உயர்த்திட மத்திய அமைச்சரவைக்கு குழு முடிவெடுத்து,  பின்னர் நிதி அமைச்சகத்தினால் உத்திரவும் இடப்பட்டு , GAZETTE  NOTIFICATION  கூட வெளியிடப்பட்டது உங்களுக்கு மறந்திருக்க முடியாது . 

ஆனால் பின்னர் இந்த  உத்திரவு மத்திய அரசு ஊழியர்களுக்குப் பொருந்தாது என்று அறிவிக்கப்பட்டதும் உங்களுக்குத்  தெரியும் . ஆனால் நேற்று மத்திய அரசின் நிலையில்  மாற்றம். 29.8.2016 அன்று மத்திய நிதி அமைச்சகத்தால்   2014-2015 நிதி ஆண்டிலிருந்து மத்திய அரசு ஊழியர்களுக்கு ( PLB  மற்றும் ADHOC BONUS)  போனஸ் உச்சவரம்பு  ரூ. 3500/- இலிருந்து ரூ. 7000/- ஆக உயர்த்தி வழங்கப்படும் என்ற உத்திரவை திடீரென  வெளியிட்டுள்ளது

செப்டம்பர்  2, வேலை நிறுத்தம் இந்திய நாட்டின் மிகப்பெரும்  11 மையத் தொழிற்சங்கங்களான  INTUC , AITUC , HMS, CITU, LPF  உள்ளிட்ட தொழிற்சங்கங்களால் அறிவிக்கப்பட்டு  நடத்தப்படும் வேலை நிறுத்தம் ஆகும்

இதில் ரயில்வே , பாதுகாப்புத் துறை தவிர்த்து அனைத்து மத்திய அரசு , மாநில அரசு, பொதுத்துறை  மற்றும் அமைப்பு சாரா  தொழிற் சங்கங்கள் கலந்து கொண்டு , மத்திய அரசின் பொருளாதாரக் கொள்கைகள் , தனியார் மயம், மத்திய அரசு, மாநில அரசு மற்றும் பொதுத் துறைகளில் அந்நிய நேரடி முதலீடு அனுமதிக்கப்படுவது, தொழிலாளர் நலச்  சட்டங்கள் திருத்தப்படுவது  இவற்றிற்கு எதிராக நடத்தப்படும் போராட்டம் ஆகும்

இந்தப் போராட்டம் என்பது ஆண்டுக்கு  ஆண்டு அரசின் கொள்கைகளுக்கு எதிராக வலுப்பெற்று வருகிறது. கடந்த ஆண்டு சுமார் 15 கோடி உழைக்கும் வர்க்கம் கலந்துகொண்ட  வேலை நிறுத்தம் , இந்த ஆண்டு  மேலும் வலுப்பெற்று 20 கோடி தொழிலாளர்கள் பங்கு பெரும் வேலை நிறுத்தமாக உருவெடுத்து வருகிறது

இதனால் மத்திய அரசு ஊழியர்களை திருப்திப் படுத்திட , மத்திய அரசு புதிய ஓய்வூதியத் திட்டத்தில்  DCRG  வழங்கப்படும் என்ற முடிவையும் , போனஸ் உச்சவரம்பு உயர்த்தி வழங்கப்படும் என்ற முடிவையும் அதிரடியாக  அறிவித்துள்ளது

இது நமது போராட்ட அறிவிப்பிற்கு மற்றும் தயாரிப்புக்கு கிடைத்த வெற்றியாகும். அனைத்து தொழிலாளர்களுடன் இணைந்து   செப். 2, 2016 வேலை நிறுத்தத்தில் கலந்துகொள்ள மத்திய அரசு ஊழியர் சங்கங்கள் எடுத்த முடிவுக்கு கிடைத்த வெற்றியாகும். எனவே இந்த வெற்றிச் செய்தியை ஊழியர்களுக்கு சரியாக எடுத்துச் செல்லுங்கள். செப். 2, 2016 வேலை நிறுத்தத்தை மேலும் வலிமைப்படுத்தி வெற்றிகரமாக ஆக்குங்கள் !

போராடாமல்  பெற்றதில்லை !                        போராடி நாம்  தோற்றதில்லை !
ஒன்று பட்ட போராட்டம் !                                               ஒன்றே நம்  துயரோட்டும் !